நாள் 5: நடைமுறைப் பயிற்சியும் விவாதமும் (Practical & Discussion)

முதல் மாதம் - கற்றல் | வாரம் 1: நடைமுறைப் பயிற்சியும் விவாதமும்

Practical & Discussion | AI நெறிமுறைகள் · இருமக் கணக்கீடுகள் · குழு விவாதம்

பேராசிரியர். சத்தியராஜ் தங்கச்சாமி

தமிழ் உதவிப்பேராசிரியர், முதன்மைப் பதிப்பாசிரியர், விக்கிமீடியர்

ஸ்ரீ கிருஷ்ணா ஆதித்யா கலை மற்றும் அறிவியல் கல்லூரி, கோயம்புத்தூர் – 641042.

தமிழ் இலக்கியத்தில் செய்யறிவின் பொருந்தும் தன்மை — தொல்காப்பியம் தொடங்கி திருக்குறள் வரை, நம் முன்னோர்கள் அறிவின் இயல்பை ஆழ்ந்து சிந்தித்துள்ளனர்.

5.0 அறிமுகம்

செய்யறிவின் வரலாறு, அதன் செயல்பாட்டு முறைகள், எண் முறைகள்குறித்த தத்துவார்த்த, தொழில்நுட்ப அறிவைக் கடந்த நான்கு பாடங்களில் விரிவாகக் கற்றோம். கற்றல் என்பது வெறும் தகவல்களைத் திரட்டுவது மட்டுமல்ல; அந்தத் தகவல்களை நடைமுறைச் சிக்கல்களோடு ஒப்பிட்டுப் பார்த்துத் தெளிவு பெறுவதே உண்மையான அறிவாகும்.

ஐந்தாம் நாளான இன்று, நாம் கற்ற கோட்பாடுகள் நிகழ் உலகில் எத்தகைய சவால்களைச் சந்திக்கின்றன என்பதை 'வழக்காய்வுகள்' (Case Studies) மூலம் ஆராய உள்ளோம். அமேசான், கிளியர்வியூ போன்ற உலகளாவிய நிறுவனங்களின் செயல்பாடுகளில் நிகழ்ந்த நெறிமுறை மீறல்களையும், இரும எண் கணக்கீடுகளை (Binary Calculations) நேரடிப் பயிற்சிகள்மூலம் செய்து பார்க்க இருக்கிறோம். மேலும், "செய்யறிவுவின் வளர்ச்சி மனித வேலைவாய்ப்பைப் பாதிக்குமா அல்லது மேம்படுத்துமா?" என்ற விவாதத்தின் வழி, தொழில்நுட்ப மாற்றத்தைத் தமிழ் இலக்கியங்கள் காட்டும் "பழையன கழிதலும் புதியன புகுதலும்" என்ற சமூகப் பரிணாமப் பார்வையோடு அணுகிப் பழகப்போகிறோம்.

5.1 செயல்பாடு 1: "நிகழ் வாழ்க்கையில் செய்யறிவு (AI) நெறிமுறை மீறல்கள்" - வழக்காய்வு (Case Study)

வழக்கு ஆய்வு 1: அமேசான் வேலைவாய்ப்புத் தேர்வு (Amazon's Recruitment AI)

2018-ல், அமேசான் நிறுவனம் வேலைவாய்ப்புக்காக உருவாக்கிய செய்யறிவு அமைப்பு, பெண்களைப் பாகுபாடு காட்டியது கண்டுபிடிக்கப்பட்டது. இந்த அமைப்பு, கடந்த 10 ஆண்டுகளாக அமேசானில் பணியாற்றிய ஆண் ஊழியர்களின் விண்ணப்பங்களைக் கொண்டு பயிற்றுவிக்கப்பட்டிருந்தது. இதன் விளைவாக, பெண்களின் விண்ணப்பங்களுக்குக் குறைந்த மதிப்பெண்களை வழங்கியது. குறிப்பாக, "பெண்கள்" என்ற சொல் வரும் விண்ணப்பங்களுக்குக் குறைந்த மதிப்பெண்களை வழங்கியது. இது தரவுகளில் இருந்த பக்கச்சார்பு, செய்யறிவின் மூலம் மீண்டும் உற்பத்தி செய்யப்பட்டதற்கு ஓர் எடுத்துக்காட்டு.

வழக்கு ஆய்வு 2: கிளியர்வியூ ஃபேஸ் ரெகக்னிஷன் (Clearview AI)

2020-ல், கிளியர்வியூ என்ற நிறுவனம், சமூக வலைத்தளங்களிலிருந்து 3 பில்லியன் முகப் படங்களைத் திருடி, ஒரு முக அடையாளம் காணும் தரவுத்தளத்தை உருவாக்கியது. இந்தத் தரவுத்தளத்தை, காவல்துறை, தனியார் நிறுவனங்களுக்கு விற்றது. இது, தனிநபர்களின் அனுமதி இல்லாமல் அவர்களின் முகப் படங்களைச் சேகரித்தது மட்டுமல்லாமல், அவர்களின் இயக்கங்களைக் கண்காணிக்கவும் பயன்படுத்தப்பட்டது. இது தரவுத் தனியுரிமை மீறலுக்கு ஓர் எடுத்துக்காட்டு.

வழக்கு ஆய்வு 3: சாட்சிபிடி (ChatGPT)-யின் தரவு மீறல் (Data Leak)

2023-ல், ChatGPT-யில் ஒரு பாதுகாப்புக் குறைபாடு கண்டுபிடிக்கப்பட்டது. இதன் மூலம், பயனர்களின் உரையாடல் வரலாறுகள், கட்டண விவரங்கள் போன்ற தனிப்பட்ட தகவல்கள் மற்ற பயனர்களுக்குத் தெரியும் வாய்ப்பு இருந்தது. இது, செய்யறிவு அமைப்புகளில் பாதுகாப்பு எவ்வளவு முக்கியம் என்பதை உணர்த்தியது.

விவாதப் புள்ளிகள்:

• இந்த நிகழ்வுகளில், எந்தெந்த நெறிமுறைகள் மீறப்பட்டன?

• இவற்றிற்குப் பொறுப்பானவர்கள் யார்? உருவாக்கிய நிறுவனமா? பயன்படுத்திய நிறுவனமா? பயிற்றுவித்த தரவுகளின் உரிமையாளர்களா?

• இவற்றைத் தடுக்க என்ன நடவடிக்கைகள் எடுக்கப்பட்டுள்ளன? என்ன நடவடிக்கைகள் இன்னும் தேவை?

• தமிழ்நாட்டில், இது போன்ற நிகழ்வுகள் நடந்தால், தமிழ்நாடு செய்யறிவுக் கொள்கை எவ்வாறு பதிலளிக்கும்?

5.2 செயல்பாடு 2: இரும எண் கணக்கீடுகள்

# பயிற்சி 1: 25 + 17 = ? 25-ன் இருமம்: 11001 17-ன் இருமம்: 10001 1 1 0 0 1 + 1 0 0 0 1 ----------- 1 0 1 0 1 0 (42)

# பயிற்சி 2: 42 + 19 = ? 42-ன் இருமம்: 101010 19-ன் இருமம்: 010011 (6 இலக்கமாக்க) 1 0 1 0 1 0 + 0 1 0 0 1 1 ----------- 1 1 1 1 0 1 (61)

# பயிற்சி 3: 100 + 200 = ? 100-ன் இருமம்: 1100100 200-ன் இருமம்: 11001000 (8 இலக்கமாக்க) 0 1 1 0 0 1 0 0 (100) + 1 1 0 0 1 0 0 0 (200) ----------------- 1 0 0 1 0 1 1 0 0 (300)

# பயிற்சி 4: 1024 + 512 = ? 1024-ன் இருமம்: 10000000000 (11 இலக்கங்கள்) 512-ன் இருமம்: 1000000000 (10 இலக்கங்கள்) 10000000000 + 1000000000 = 11000000000 (1536)

5.3 குழு விவாதம்: "செய்யறிவின் வளர்ச்சி மனித வேலைவாய்ப்புகளைப் பாதிக்குமா அல்லது மேம்படுத்துமா?"

விவாத வழிகாட்டி

மாணவர்களை இரண்டு குழுக்களாகப் பிரிக்கவும். ஒரு குழு "செய்யறிவு (AI) வேலைவாய்ப்புகளைப் பாதிக்கும்" (Negative Impact) என்ற நிலையையும், மற்றொரு குழு "செய்யறிவு (AI) வேலைவாய்ப்புகளை மேம்படுத்தும்" (Positive Impact) என்ற நிலையையும் எடுத்து விவாதிக்க வேண்டும்.

நிலை 1: செய்யறிவு (AI) வேலைவாய்ப்புகளைப் பாதிக்கும் (எதிர்மறைக் குழு)

• பல பாரம்பரிய வேலைகள் மறைந்து வருகின்றன. எடுத்துக்காட்டு: வங்கிக் கிளைகளில் பணியாளர்கள் குறைப்பு, தொழிற்சாலைகளில் தொழிலாளர்கள் குறைப்பு.

• புதிய வேலைகளுக்குத் தேவையான திறன்கள் பழைய தொழிலாளர்களிடம் இல்லை. இது வேலை இல்லாத ஏழ்மையை (Jobless Poverty) உருவாக்குகிறது.

• செய்யறிவுவால் செய்யப்படும் பணிகளுக்கு மனிதர்கள் போட்டியிட முடியாது. செய்யறிவு (AI) 24 மணி நேரமும், பிழையின்றி, குறைந்த செலவில் வேலை செய்யும்.

• தமிழ்நாடு போன்ற மாநிலங்களில், சிறு தொழில்கள் (கைத்தறி, பொம்மை தயாரிப்பு, கைவினைப் பொருட்கள்) செய்யறிவால் பாதிக்கப்படும் அபாயம் உள்ளது.

நிலை 2: செய்யறிவு (AI) வேலைவாய்ப்புகளை மேம்படுத்தும் (நேர்மறைக் குழு)

• செய்யறிவு புதிய வேலை வாய்ப்புகளை உருவாக்கியுள்ளது. தரவு விஞ்ஞானி, செய்யறிவு நெறிமுறை நிபுணர், செய்யறிவுப் பயிற்சியாளர் போன்ற புதிய பதவிகள் உருவாகியுள்ளன.

• செய்யறிவு மனிதர்களை வேலையிலிருந்து இடம்பெயர்த்தாலும், அவர்களை உயர்தர வேலைகளுக்கு மாற்றுகிறது. எடுத்துக்காட்டு: கணக்கெழுதும் பணியிலிருந்து, தரவு பகுப்பாய்வுப் பணிக்கு மாறுதல்.

• செய்யறிவு மனிதர்களின் உற்பத்தித் திறனை அதிகரிக்கிறது. ஒரு மனிதர் செய்யறிவு உதவியுடன் 10 மடங்கு வேலை செய்ய முடியும்.

• தமிழ்நாட்டில், செய்யறிவைப் பயன்படுத்தி சிறு தொழில்களை மேம்படுத்தலாம். எடுத்துக்காட்டு: கைத்தறி வடிவமைப்புகளைச் செய்யறிவு மூலம் உருவாக்குதல், பொம்மை தயாரிப்பில் செய்யறிவைப் பயன்படுத்துதல்.

விவாதத்திற்கான வழிகாட்டி:

• ஒவ்வொரு குழுவும் தங்கள் வாதங்களை 10 புள்ளிகளில் சுருக்கமாகத் தயாரித்துக் கொள்ள வேண்டும்.

• ஒவ்வொரு வாதத்திற்கும், ஒரு சான்று அல்லது புள்ளிவிவரம் இருக்க வேண்டும்.

• எதிர்க் குழுவின் வாதங்களை மறுப்பதற்குத் தயாராக இருக்க வேண்டும்.

• விவாதத்தின் முடிவில், இரு குழுக்களும் ஒரு பொதுவான முடிவுக்கு வர முயற்சிக்க வேண்டும்.

தமிழ் இலக்கியக் குறிப்புகள்:

• "தொழில்" பற்றிய சங்க இலக்கியக் குறிப்புகள் (குறுந்தொகை, புறநானூறு)

• "உழவுத் தொழில்" பற்றிய திருக்குறள் குறிப்புகள் (குறள் 1031-1040)

• "புதியன புகுதல், பழையன கழிதல்" பற்றிய நன்னூல் குறிப்புகள்

• இன்றைய செய்யறிவு வளர்ச்சியை இலக்கியப் பார்வையில் எவ்வாறு அணுகலாம் என்பதற்கான வழிகாட்டி

5.4 நிறைவாக

நடைமுறைப் பயிற்சிகளும் விவாதங்களும் நிறைந்த இன்றைய பாடத்தின் வழி, செய்யறிவு என்பது வெறும் கணினித் திரை சார்ந்த ஒன்றல்ல; அது நமது சமூக நீதி, தனிமனித உரிமை, வாழ்வாதாரத்தோடு நேரடித் தொடர்புடையது என்பதை உணர்ந்தோம்.

இன்று நாம் கற்றுக்கொண்டவை:

நெறிமுறை விழிப்புணர்வு:

அமேசான், கிளியர்வியூ நிகழ்வுகளின் மூலம், தரவுகளில் உள்ள பக்கச்சார்பும் (Bias) தனியுரிமை மீறல்களும் எத்தகைய பாதிப்புகளை ஏற்படுத்தும் என்பதைத் தெளிவுபடுத்திக் கொண்டோம்.

கணக்கீட்டுத் திறன்:

25 முதல் 1024 வரையிலான தசம எண்களை இரும எண்களாக மாற்றி, அவற்றைக் கூட்டும் கணிதப் பயிற்சிகளைச் செய்து பார்த்தோம். இது நம் சிந்திக்கும் திறனைத் துல்லியமாக்கியது.

ஆக்கப்பூர்வ விவாதம்:

செய்யறிவு, வேலைவாய்ப்புகுறித்த விவாதத்தின் மூலம், தொழில்நுட்பத்தை ஒரு எதிரியாகப் பார்க்காமல், மனித ஆற்றலை மேம்படுத்தும் ஒரு கருவியாக மாற்றும் வழிகளை ஆராய்ந்தோம்.

இலக்கியப் பார்வை:

உழவுத் தொழில்பற்றிய வள்ளுவரின் குறள்களையும், தொழிலாளர் மேன்மை பற்றிய சங்க இலக்கியக் குறிப்புகளையும் இன்றைய 'வேலைவாய்ப்பு மாற்றங்களோடு' ஒப்பிட்டுப் பார்த்தது நம் புரிதலை ஆழப்படுத்தியது.

வள்ளுவர் "அறிவுடையார் எல்லாம் உடையார்" என்று குறிப்பிட்டது போல, தொழில்நுட்பத்தின் நுணுக்கங்களை நெறிமுறைகளோடு கற்பதே ஒரு மாணவனுக்குச் சிறந்த அறிவாகும். முதல் வாரத்தின் இந்த மதிப்பீடுகள், வரும் வாரங்களில் நாம் கற்கவிருக்கும் இன்னும் சிக்கலான தொழில்நுட்பக் கருத்துகளுக்கு உறுதியான அடித்தளமாக அமையும்.

அடுத்த வாரம் (வாரம்-2): செய்யறிவிடமிருந்து மிகச்சரியான பதில்களைப் பெறுவதற்கான கலை, அறிவியலான "தூண்டல் பொறியியல்" (Prompt Engineering) குறித்துத் தொடங்க உள்ளோம். சிறந்த கட்டளைகளை எழுதும் இந்தப் புதிய கலைப் பயணம் அடுத்த வகுப்பில் தொடரும்!

📝 வாரம் 1: மதிப்பீடு (Assessment)

1. சுய மதிப்பீடு: செய்யறிவின் வரலாறு மற்றும் அதன் பல்வேறு நிலைகள்

• செய்யறிவின் வரலாற்றில் முக்கியமான மூன்று திருப்புமுனைகள் யாவை?

1950: ஆலன் டூரிங் டூரிங் சோதனையை முன்மொழிதல்

1956: டார்ட்மவுத் மாநாடு, "Artificial Intelligence" என்ற சொல்லின் பிறப்பு

2012: ஆழ்ந்த கற்றல் (Deep Learning) புரட்சி, ImageNet போட்டியில் வெற்றி

2020: பெரும் மொழி மாதிரிகள் (LLMs) வருகை, ChatGPT

• செய்யறிவு முகவர் (AI Agent) என்றால் என்ன? ஒரு தமிழ் இலக்கிய உருவகத்துடன் விளக்குக.

செய்யறிவு (AI) முகவர் என்பது ஒரு சூழலிலிருந்து தகவல்களைப் பெற்று, அவற்றைப் பகுப்பாய்வு செய்து, தகுந்த முடிவுகளை எடுத்துச் செயல்படும் அமைப்பு.

இலக்கிய உருவகம்: கம்பராமாயணத்தில் அனுமார். சூழல்: இலங்கை; தகவல்கள்: கடல், அரக்கர்கள், அசோக வனம்; முடிவுகள்: கடலைத் தாண்டுதல், சீதையைக் கண்டுபிடித்தல்.

• செய்யறிவு முகவர்களின் மூன்று வகைகளைப் பட்டியலிடுக.

எளிய எதிர்வினை முகவர் (Simple Reflex Agent): தற்போதைய உணர்வுகளுக்கு மட்டும் எதிர்வினையாற்றும்.

நிலை சார்ந்த முகவர் (Model-based Agent): சூழலின் நிலையைக் கணித்துச் செயல்படும்.

கற்றல் முகவர் (Learning Agent): அனுபவத்திலிருந்து கற்றுக்கொள்ளும்.

2. கட்டுரை: "செய்யறிவு வடிவமைப்பில் வெளிப்படைத்தன்மை (Transparency) ஏன் அவசியம்?" - 500 வார்த்தைகளில் விவரிக்கவும்.

கட்டுரைக்கான வழிகாட்டி:

• அறிமுகம்: வெளிப்படைத்தன்மை என்றால் என்ன? செய்யறிவில் ஏன் இது முக்கியம்?

• பகுதி 1: வெளிப்படைத்தன்மை இல்லாததால் ஏற்படும் சிக்கல்கள் (எ.கா: பக்கச்சார்பு, தவறான முடிவுகள், பொறுப்பு ஏற்பதில் சிக்கல்)

• பகுதி 2: வெளிப்படைத்தன்மை இருப்பதால் கிடைக்கும் பயன்கள் (எ.கா: நம்பிக்கை, சரிபார்ப்புத் திறன், திருத்தம் செய்யும் வாய்ப்பு)

• பகுதி 3: தமிழ் இலக்கியத்தில் வெளிப்படைத்தன்மை பற்றிய கருத்துகள் (எ.கா: திருக்குறள் "வெளிப்படை" பற்றிய குறிப்புகள்)

• முடிவு: வெளிப்படையான செய்யறிவை உருவாக்குவதற்கான வழிமுறைகள்.

3. கணக்கீடு: கொடுக்கப்பட்ட தசம எண்களை இரும எண்களாக மாற்றி கூட்டல் பலனைக் கண்டறிக.

கேள்வி 1: 45 + 23 = ? 45-ன் இருமம்: 101101 23-ன் இருமம்: 010111 கூட்டல்: 101101 + 010111 = 1000100 (68) கேள்வி 2: 128 + 64 = ? 128-ன் இருமம்: 10000000 64-ன் இருமம்: 01000000 கூட்டல்: 10000000 + 01000000 = 11000000 (192) கேள்வி 3: 250 + 125 = ? 250-ன் இருமம்: 11111010 125-ன் இருமம்: 01111101 கூட்டல்: 11111010 + 01111101 = 101110111 (375) [9 இலக்க முடிவு] கேள்வி 4: 1023 + 1 = ? 1023-ன் இருமம்: 1111111111 (10 இலக்கங்கள்) 1-ன் இருமம்: 0000000001 கூட்டல்: 1111111111 + 0000000001 = 10000000000 (1024)

📚 கூடுதல் வாசிப்புக்கு (Additional Reading)

தமிழ் இலக்கிய நூல்கள்:

• திருக்குறள் — அறத்துப்பால் - ஒழுக்கம், வெளிப்படை, நடுவு நிலைமை பற்றிய குறள்கள்.

• புறநானூறு — பாடல்கள் 192, 194 - சமத்துவம், இயற்கை பற்றிய கருத்துகள்.

• சிலப்பதிகாரம் — அரங்கேற்றுக் காதை - கலை, தொழில்நுட்பம், சமூகம் பற்றிய கருத்துகள்.

• கணக்கதிகாரம் — எண் கணிதம், இருமை பற்றிய கருத்துகள்.

• மணிமேகலை — தவம், காரணம், விளைவு பற்றிய கருத்துகள்.

சர்வதேச ஆவணங்கள்:

• UNESCO Recommendation on the Ethics of Artificial Intelligence (2021)

• EU AI Act (2021) - ஐரோப்பிய ஒன்றியத்தின் செய்யறிவுச் சட்டம்.

• Tamil Nadu AI Policy (2023) - தமிழ்நாடு அரசின் செய்யறிவுக் கொள்கை.

📺 காணொலி விரிவுரையைப் பாருங்கள்

முதல் வாரம், ஐந்தாம் நாள் முழு விளக்கவுரை (காணொலி நேரம்: 75:00)

முதல் மாதம் - கற்றல் | வாரம் 1: நடைமுறைப் பயிற்சியும் விவாதமும் (நாள் 5)

AI நெறிமுறை மீறல்கள் | இரும எண் கணக்கீடுகள் | AI-யும் வேலைவாய்ப்பும்

"புதியன புகுதல், பழையன கழிதல்" — நன்னூல்

முதல் வாரத்தின் முடிவில், AI நெறிமுறை மீறல்களைப் பகுப்பாய்வு செய்யும் திறன், இரும எண் கணக்கீடுகளைச் செய்யும் திறன், AI-யின் வேலைவாய்ப்புத் தாக்கம் பற்றி விமர்சன ரீதியாகச் சிந்திக்கும் திறன் ஆகியவற்றைப் பெற்றிருப்பீர்கள்.

நாள் 4: கணினி அமைப்பும் எண் முறைகளும் (Computer Systems & Binary)

முதல் மாதம் - கற்றல் | வாரம் 1: கணினி அமைப்பும் எண் முறைகளும்

Computer Systems & Binary | தமிழ் இலக்கியத்தில் கணிதமும் இருமையும்

பேராசிரியர். சத்தியராஜ் தங்கச்சாமி

தமிழ் உதவிப்பேராசிரியர், முதன்மைப் பதிப்பாசிரியர், விக்கிமீடியர்

ஸ்ரீ கிருஷ்ணா ஆதித்யா கலை மற்றும் அறிவியல் கல்லூரி, கோயம்புத்தூர் – 641042.

தமிழ் இலக்கியத்தில் கணினியியலின் பொருந்தும் தன்மை — தொல்காப்பியம், திருக்குறள், கணக்கதிகாரம் வரை நம் முன்னோர்கள் கணிதத்தையும் தர்க்கத்தையும் ஆழ்ந்து சிந்தித்துள்ளனர்.

4.0 அறிமுகம்

செய்யறிவின் அறநெறிகள், சமூகத் தாக்கங்களை முந்தைய பாடங்களில் விரிவாகக் கண்டோம். இந்த ஐந்தாம் தலைமுறைத் தொழில்நுட்பங்கள் அனைத்தும் இயங்குவதற்கு அடிப்படையாக அமைவது கணினியின் உள்ளமைந்த கட்டமைப்பும் (Architecture), அது தரவுகளைக் கையாளும் கணித முறையுமாகும்.

மனிதர்கள் மொழியால் கருத்துகளைப் பரிமாறிக்கொள்வது போல, கணினிகள் எண்களால் தகவல்களைப் பரிமாறிக்கொள்கின்றன. ஒரு கணினி எவ்வாறு வன்பொருள், மென்பொருளின் ஒருங்கிணைப்பால் இயங்குகிறது என்பதையும், மின்சாரத்தின் இரு நிலைகளை (On/Off) அடிப்படையாகக் கொண்ட 'இரும எண் முறை' (Binary System) எவ்வாறு பிரம்மாண்டமான தரவுகளைக் கையாளுகிறது என்பதையும் இப்பாடத்தில் காண்போம். இதனை நமது முன்னோர்கள் கணிதத்திலும் தர்க்கத்திலும் கையாண்ட நுணுக்கமான இலக்கியச் சான்றுகளோடு இணைத்துப் புரிந்துகொள்வோம்.

4.1 கணினி அமைப்பின் அறிமுகம்: ஒரு இலக்கிய ஒப்புமை

கணினி அமைப்பு என்பது வன்பொருள் (Hardware), மென்பொருள் (Software) ஆகிய இரண்டின் ஒருங்கிணைப்பாகும். வன்பொருள் என்பது நாம் தொட்டுப் பார்க்கக்கூடிய பகுதிகள் - கணினியின் உடல் பாகங்கள். மென்பொருள் என்பது கணினிக்கு என்ன செய்ய வேண்டும் என்று கட்டளை இடும் நிரல்கள்.

தமிழ் இலக்கியத்தின், "உடம்பும் உயிரும்" என்ற உவமை இதற்குப் பொருந்தும். வன்பொருள் என்பது உடம்பு போன்றது; மென்பொருள் என்பது உயிர் போன்றது. உடம்பு இருந்தால் மட்டும் போதாது, உயிர் இருந்தால்தான் உடல் இயங்கும். அதுபோலவே, வன்பொருள் இருந்தால் மட்டும் போதாது, மென்பொருள் இருந்தால்தான் கணினி இயங்கும்.

4.1.1 வன்பொருளின் முக்கிய பகுதிகள்

மையச் செயலகம் (Central Processing Unit - CPU):

கணினியின் மூளை. இதுதான் அனைத்துக் கணக்கீடுகளையும் செய்கிறது.

நினைவகம் (Memory):

தற்காலிகமாகத் தரவுகளைச் சேமிக்கும் இடம். இது இரண்டு வகைப்படும்: RAM (Random Access Memory) - வேகமானது, ஆனால் மின்சாரம் நின்றால் அழியும்; ROM (Read Only Memory) - மெதுவானது, ஆனால் மின்சாரம் நின்றாலும் அழியாது.

சேமிப்பகம் (Storage):

நிரந்தரமாகத் தரவுகளைச் சேமிக்கும் இடம். எடுத்துக்காட்டுகள்: வன்தட்டு (Hard Disk), SSD (Solid State Drive).

உள்ளீட்டுக் கருவிகள் (Input Devices):

தரவுகளைக் கணினிக்குள் அனுப்பும் கருவிகள். எடுத்துக்காட்டுகள்: விசைப்பலகை (Keyboard), சுட்டி (Mouse), தொடுதிரை (Touchscreen).

வெளியீட்டுக் கருவிகள் (Output Devices):

கணினியின் முடிவுகளை நமக்குக் காட்டும் கருவிகள். எடுத்துக்காட்டுகள்: திரை (Monitor), அச்சுப்பொறி (Printer), ஒலிபெருக்கி (Speaker).

4.1.2 மென்பொருளின் முக்கிய வகைகள்

இயக்கு அமைப்பு (Operating System):

கணினியின் அடிப்படை மென்பொருள். எடுத்துக்காட்டுகள்: Windows, macOS, Linux, Android, iOS.

பயன்பாட்டு மென்பொருள் (Application Software):

பயனர்களின் தேவைகளை நிறைவேற்றும் மென்பொருள்கள். எடுத்துக்காட்டுகள்: Microsoft Word, Google Chrome, WhatsApp, Photoshop.

தமிழ் இலக்கியத்தில், ஒரு செயலைச் செய்வதற்குத் தேவையான சாதனங்களையும் (Resources), அதற்கான திட்டமிடுதலையும் "கருவி", "வினை" எனப் பிரித்துப் பார்க்கும் மரபு உள்ளது. குறிப்பாக, திருக்குறளின் 675-வது குறளான "பொருட்கருவி காலமும் வினையிடனோடும் ஐந்தும்..." என்பது ஒரு செயலை வெற்றிகரமாக முடிக்கத் தேவையான ஐந்து காரணிகளை விளக்குகிறது. இதில் "கருவி" (Hardware) என்பது செயல்படத் தேவையான உடல் போன்ற அமைப்பையும், "வினை" அல்லது "செய்கை" (Software/Logic) என்பது அந்த உடலை இயக்கும் அறிவுசார் கட்டளைகளையும் குறிக்கிறது. கணினி அமைப்பில் வன்பொருள் என்பது தொட்டுணரக்கூடிய 'கருவி' என்றால், அந்த வன்பொருளைச் சரியாக இயக்கி ஒரு பயனுள்ள செயலைச் செய்ய வைக்கும் மென்பொருள் அதன் 'காரணமாக' அல்லது 'வினையாக' அமைகிறது. உடலும் உயிரும் இணைந்து ஒரு மனிதனை இயக்குவது போல, வன்பொருளும் மென்பொருளும் இணைந்தால் மட்டுமே ஒரு கணினி முழுமையான செயல்பாட்டைப் பெறுகிறது.

4.2 இரும எண்கள் (Binary Numbers): புறநானூறு காட்டும் இருமைத் தத்துவம்

கணினிகள் தரவுகளைச் சேமிப்பதற்கும், செயல்படுவதற்கும் இரும எண் முறையை (Binary Number System) பயன்படுத்துகின்றன. இரும எண் முறையில், எல்லாத் தரவுகளும் 0, 1 என்ற இரண்டு இலக்கங்களால் மட்டுமே குறிக்கப்படுகின்றன. மின் சுற்றுகளில் மின்சாரம் இருப்பது (1) அல்லது இல்லாதது (0) என்ற இரண்டு நிலைகளை அடிப்படையாகக் கொண்டே இது இயங்குகிற다.

தமிழ் இலக்கியமான புறநானூற்றில் (பாடல் 189), "உண்பது நாழி; உடுப்பவை இரண்டே" என்று மதுரைக் கணக்காயனார் மகனார் நக்கீரனார் குறிப்பிடுகிறார். உலகையே ஆளும் பேரரசனாக இருந்தாலும், காட்டில் வேட்டையாடும் வேடனாய் இருந்தாலும் அடிப்படைத் தேவைகள் என்னவோ 'ஒன்று' (உணவு), 'இரண்டு' (உடை) என்ற எளிய எண்களுக்குள் அடங்கிவிடுகின்றன என்பதே இதன் சாரம்.

இந்தத் தத்துவம் கணினி அறிவியலுக்கு மிக நெருக்கமானது. உலகில் உள்ள மிகச் சிக்கலான தகவல்கள், உயர் இரகப் படங்கள், காணொளிகள் என அனைத்தும் இறுதியில் 0, 1 என்ற இரண்டு நிலைகளுக்குள் (Duality) அடக்கப்படுகின்றன. வெளிச்சம்-இருட்டு, நன்மை-தீமை, உயிர்-உடல் போன்ற இயற்கையின் இருமை நிலைகளைப் போலவே, கணினிகளும் இந்த இரண்டு நிலைகளின் கலவையால் பிரம்மாண்டமான எண்ணிம (டிஜிட்டல்) உலகை உருவாக்குகின்றன.

தசம எண் முறை (Decimal) 0-9 வரையிலான பத்து இலக்கங்களைக் கொண்டது. நாம் அன்றாடம் பயன்படுத்துவது தசம எண் முறையே. இரும எண் முறை 0, 1 என்ற இரண்டு இலக்கங்களை மட்டுமே கொண்டது. எப்படி தசம எண்களை இரும எண்களாக மாற்றுவது?

4.2.1 தசமத்தை இருமமாக மாற்றும் முறை

# 13-ஐ இருமமாக மாற்றுதல் 13 ÷ 2 = 6, மீதி 1 6 ÷ 2 = 3, மீதி 0 3 ÷ 2 = 1, மீதி 1 1 ÷ 2 = 0, மீதி 1 மீதிகளைப் பின்னோக்கி எழுத: 1101 ∴ 13 (தசம) = 1101 (இரும)

4.2.2 இருமத்தை தசமமாக மாற்றும் முறை

# 1101 (இரும)-ஐ தசமமாக மாற்றுதல் 1 × 2³ = 1 × 8 = 8 1 × 2² = 1 × 4 = 4 0 × 2¹ = 0 × 2 = 0 1 × 2⁰ = 1 × 1 = 1 கூட்டு: 8 + 4 + 0 + 1 = 13 ∴ 1101 (இரும) = 13 (தசம)

தமிழ் இலக்கியத்தில், "எண்" பற்றிய விரிவான விளக்கங்கள் உள்ளன. தொல்காப்பியம், "எண்ணென்ப ஏனை எழுத்தென்ப இவற்றிரண்டும்" என்று கூறுகிறது. இது மொழியில் எண்களும் எழுத்துகளும் இரு முக்கிய பிரிவுகள் என்பதை உணர்த்துகிறது. கணினியில், எழுத்துகளும் எண்களாகவே (ASCII, Unicode) சேமிக்கப்படுகின்றன. ஒவ்வொரு எழுத்துக்கும் ஒரு இரும எண் குறியீடு உள்ளது.

4.3 இரும எண்கணிதச் செயல்பாடுகள் (Binary Arithmetic): கணக்கதிகாரம் காட்டிய வழி

இரும எண்களைக் கொண்டு கூட்டல், கழித்தல், பெருக்கல், வகுத்தல் போன்ற எண்கணிதச் செயல்பாடுகளைச் செய்ய முடியும். இவை தசம எண்கணிதத்தைப் போன்றவை. ஆனால் சில வேறுபாடுகள் உள்ளன.

4.3.1 இருமக் கூட்டல் (Binary Addition)

அடிப்படை விதிகள்:

0 + 0 = 0 | 0 + 1 = 1 | 1 + 0 = 1 | 1 + 1 = 0 (1 மேலுள்ள இடத்திற்குக் கடத்தல் - Carry 1)

# 1011 (11) + 1101 (13) = ? 1 0 1 1 + 1 1 0 1 --------- 1 1 0 0 0 (24) விளக்கம்: • வலப்பக்க இலக்கங்கள்: 1 + 1 = 0, கடத்தல் 1 • அடுத்த இலக்கங்கள்: 1 + 0 + கடத்தல் 1 = 0, கடத்தல் 1 • அடுத்த இலக்கங்கள்: 0 + 1 + கடத்தல் 1 = 0, கடத்தல் 1 • அடுத்த இலக்கங்கள்: 1 + 1 + கடத்தல் 1 = 1, கடத்தல் 1 • இறுதிக் கடத்தல்: 1

4.3.1.2 இருமக் கழித்தல் (Binary Subtraction)

இருமக் கழித்தலுக்கு, 2-ன் நிரப்பு முறை (2's Complement) பயன்படுத்தப்படுகிறது. இது கழிப்பதைக் கூட்டலாக மாற்றும் ஒரு நுணுக்கமான முறையாகும்.

# 1011 (11) - 0110 (6) = ? 1. 0110-ன் 1-ன் நிரப்பு: 1001 2. 2-ன் நிரப்பு: 1001 + 1 = 1010 3. 1011 + 1010 = 10101 (5-இலக்க முடிவு) 4. கடைசி கடத்தலை நீக்கினால்: 0101 (5) கிடைக்கும்.

4.3.1.3 இருமப் பெருக்கல் (Binary Multiplication)

# 101 (5) × 011 (3) = ? 1 0 1 × 0 1 1 ------- 1 0 1 (101 × 1) 1 0 1 (101 × 1, ஒரு இடம் இடப்பெயர்வு) 0 0 0 (101 × 0, இரண்டு இடம் இடப்பெயர்வு) --------- 1 1 1 1 (15)

4.3.2 பிட்-மாற்றம் (Bit-Shifting)

இடது மாற்றம் (Left Shift):

ஒவ்வொரு இடது மாற்றமும் எண்ணை 2-ஆல் பெருக்கும். (1011 << 1 = 10110, அதாவது 11 × 2 = 22)

வலது மாற்றம் (Right Shift):

ஒவ்வொரு வலது மாற்றமும் எண்ணை 2-ஆல் வகுக்கும். (1011 >> 1 = 101, அதாவது 11 ÷ 2 = 5)

தமிழ் இலக்கியத்தில், கணக்கதிகாரம் எனும் நூல் கணிதம் பற்றிய விரிவான விளக்கங்களைக் கொண்டுள்ளது. இந்நூலில், "எண்கணிதம்", "பெருக்கல்", "வகுத்தல்" பற்றிய நுணுக்கமான விளக்கங்கள் உள்ளன. இன்றைய கணினிகளும் இதே அடிப்படைக் கணித முறைகளையே பயன்படுத்துகின்றன. நமது முன்னோர்கள் கணிதத்தில் காட்டிய துல்லியமும், நுணுக்கமும் இன்றைய தொழில்நுட்பத்தின் அடித்தளமாக அமைந்துள்ளன.

4.4 நிறைவாக

"கணினி அமைப்பும் எண் முறைகளும்" குறித்த இன்றைய பாடத்தில், ஒரு நவீன எந்திரம் எவ்வாறு மிக எளிமையான '0', '1' என்ற எண்களைக் கொண்டு பிரம்மாண்டமான பணிகளைச் செய்கிறது என்பதை அறிந்தோம்.

இன்று நாம் கற்றவை

உடம்பும் உயிரும்:

கணினியின் வன்பொருள் (Hardware) உடலாகவும், மென்பொருள் (Software) உயிராகவும் இணைந்து இயங்குவதைத் திருக்குறள் காட்டிய "கருவியும் காரணமும்" என்ற கருத்தியலோடு ஒப்பிட்டுப் பார்த்தோம்.

இருமத்தின் வலிமை (Binary Power):

மின்சாரத்தின் இரு நிலைகளை அடிப்படையாகக் கொண்ட 0, 1 என்ற இரும எண்களே கணினியின் அடிப்படை மொழி என்பதை உணர்ந்தோம். இது புறநானூறு காட்டும் 'இருமை' (Duality) தத்துவத்தோடு ஒத்துப்போவதை அறிந்தோம்.

எண் மாற்ற முறைகள்:

தசம எண்களை இருமமாகவும், இரும எண்களைத் தசமமாகவும் மாற்றும் கணக்கீட்டு முறைகளைப் பயிற்சி செய்தோம்.

எண்கணிதச் செயல்பாடுகள்:

இருமக் கூட்டல், 2-ன் நிரப்பு முறை (2's Complement) வழி கழித்தல், பிட்-மாற்றம் (Bit-Shifting) போன்ற நுட்பங்களைக் கண்டோம். இவை 'கணக்கதிகாரம்' போன்ற நமது பண்டைய நூல்கள் காட்டிய கணிதத் துல்லியத்தின் தொடர்ச்சியே என்பதைப் புரிந்துகொண்டோம்.

மொழியில் எழுத்துகள் எவ்வளவு முக்கியமோ, அவ்வளவு முக்கியத்துவம் கணினியில் எண்களுக்கு உண்டு என்பதைத் திருவள்ளுவரின் "எண்ணென்ப ஏனை எழுத்தென்ப" என்ற வரிகள் நமக்கு மீண்டும் உறுதிப்படுத்துகின்றன. இந்த அடிப்படைக் கணித அறிவே வருங்காலச் செய்யறிவுக் கருவிகளை நாம் செம்மையாக இயக்க உதவும்.

அடுத்த பாடத்தில்: செய்யறிவின் இதயமாக விளங்கும் "நடைமுறைப் பயிற்சியும் விவாதமும் (Practical & Discussion)" குறித்து விரிவாகக் காண்போம். தமிழ் இலக்கியத்தின் வழிகாட்டுதலுடன் தொழில்நுட்பப் பயணம் தொடரும்!

நாள் 4 பயிற்சிகள்

செயல்பாடுகள்

1. கணினி அமைப்பு விளக்கம்:

உங்கள் வீட்டில் உள்ள கணினி அல்லது மடிக்கணினியின் வன்பொருள் பகுதிகளைப் பட்டியலிடுக. CPU, RAM, Storage, Input, Output Devices ஆகியவற்றைக் குறிப்பிடுக. ஒவ்வொன்றின் பணியையும் தமிழ் இலக்கிய ஒப்புமையுடன் விளக்குக.

2. தசம-இரும மாற்றப் பயிற்சி:

கீழ்க்கண்ட தசம எண்களை இரும எண்களாக மாற்றுக: 25, 42, 100, 255, 512

கீழ்க்கண்ட இரும எண்களை தசம எண்களாக மாற்றுக: 11001, 101010, 1100100, 11111111, 1000000000

வழிகாட்டி: 25 = 11001, 42 = 101010, 100 = 1100100, 255 = 11111111, 512 = 1000000000

3. இரும எண்கணிதப் பயிற்சி:

கீழ்க்கண்ட இரும எண்களைக் கூட்டுக: 1011 + 1101, 1111 + 0001, 101010 + 110011

கீழ்க்கண்ட இரும எண்களைக் கழிக்க (2's complement முறையில்): 1100 - 1010, 1001 - 0111

கீழ்க்கண்ட இரும எண்களைப் பெருக்குக: 101 × 011, 110 × 101

விடைகள்: 1011+1101=11000, 1111+0001=10000, 1100-1010=0010, 101×011=1111

நாள் 4 மதிப்பீடு

1. கோட்பாட்டு வினாக்கள்:

• வன்பொருள் (Hardware) மற்றும் மென்பொருள் (Software) ஆகியவற்றுக்கு இடையே உள்ள வேறுபாடுகளை விளக்குக. தமிழ் இலக்கியத்தில் இருந்து ஒரு ஒப்புமையைக் காட்டுக.

• இரும எண் முறை என்றால் என்ன? கணினிகள் ஏன் இரும எண் முறையைப் பயன்படுத்துகின்றன? புறநானூறு கூறும் "உண்பது நாழி; உடுப்பவை இரண்டே" என்ற கருத்துடன் தொடர்புபடுத்தி விளக்குக.

• 2-ன் நிரப்பு முறை (2's Complement) என்றால் என்ன? இருமக் கழிப்பில் இது எவ்வாறு பயன்படுகிறது?

• "கருவியும் காரணமும்" (திருக்குறள் 75) — இக்குறளுக்கு கணினி அமைப்பின் பின்னணியில் விளக்கம் எழுதுக.

2. கணக்கீட்டுப் பணி:

கொடுக்கப்பட்ட தசம எண்களை இரும எண்களாக மாற்றி, கூட்டல் பலனைக் கண்டறிக.

• 45 + 23 = ?

• 128 + 64 = ?

• 250 + 125 = ?

• 1023 + 1 = ?

விடைகள்: 45+23=68 (1000100), 128+64=192 (11000000), 250+125=375 (101110111), 1023+1=1024 (10000000000)

📚 கூடுதல் வாசிப்புக்கு (Additional Reading)

தமிழ் இலக்கிய நூல்கள்:

• திருக்குறள் — "கருவியும் காரணமும்" (குறள் 75), "பொருட்கருவி காலமும் வினையிடனோடும்" (குறள் 675)

• புறநானூறு — "உண்பது நாழி; உடுப்பவை இரண்டே" (பாடல் 189)

• தொல்காப்பியம் — "எண்ணென்ப ஏனை எழுத்தென்ப"

• கணக்கதிகாரம் — எண்கணிதம், பெருக்கல், வகுத்தல் பற்றிய விளக்கங்கள்

நவீன நூல்கள்:

• தெய்வசுந்தரம் ந., மொழியியலும் கணினிமொழியியலும் (தொகுதி இரண்டு), அமுத நிலையம், சென்னை. (2021)

• Thangasamy, S., et al. (2024). பைத்தான் தானியக்கம்வழி விக்கிமூல மேலடி - கீழடி மேம்பாடு. https://doi.org/10.5281/zenodo.10991314

• பைத்தான் - தமிழ் விக்கிப்பீடியா

📺 காணொலி விரிவுரையைப் பாருங்கள்

முதல் வாரம், நான்காம் நாள் முழு விளக்கவுரை (காணொலி நேரம்: 72:30)

முதல் மாதம் - கற்றல் | வாரம் 1: கணினி அமைப்பும் எண் முறைகளும் (நாள் 4)

வன்பொருள் | மென்பொருள் | இரும எண்கள் | இரும எண்கணிதம்

"கருவியும் காரணமும்" — திருக்குற�் 75

இப்பாடத்தின் முடிவில், கணினி அமைப்பின் அடிப்படைக் கூறுகளையும், இரும எண் முறையையும், இரும எண்கணிதச் செயல்பாடுகளையும் தமிழ் இலக்கிய ஒப்புமைகளுடன் அறிந்துகொள்வீர்கள்.

நாள் 3: செயற்கை நுண்ணறிவு நெறிமுறைகள் - பகுதி 2 (Ethical AI - Part 2)

முதல் மாதம் - கற்றல் | வாரம் 1: செய்யறிவு நெறிமுறைகள் - பகுதி 2

Ethical AI - Part 2 | பக்கச்சார்பு · தனியுரிமை · சுற்றுச்சூழல்

பேராசிரியர். சத்தியராஜ் தங்கச்சாமி

தமிழ் உதவிப்பேராசிரியர், முதன்மைப் பதிப்பாசிரியர், விக்கிமீடியர்

ஸ்ரீ கிருஷ்ணா ஆதித்யா கலை மற்றும் அறிவியல் கல்லூரி, கோயம்புத்தூர் – 641042.

தமிழ் இலக்கியத்தில் செய்யறிவின் பொருந்தும் தன்மை — தொல்காப்பியம் தொடங்கி திருக்குறள் வரை, நம் முன்னோர்கள் அறிவின் இயல்பை ஆழ்ந்து சிந்தித்துள்ளனர்.

3.0 அறிமுகம்

செய்யறிவின் தொழில்நுட்ப வளர்ச்சி எவ்வளவு முக்கியமோ, அதே அளவு அதன் அறநெறி சார்ந்த செயல்பாடும் (Ethical AI) முக்கியமானது. முந்தைய பாடத்தில் சமூக, சட்டத் தாக்கங்களைப் பார்த்தோம். அதன் தொடர்ச்சியாக, இன்றைய பாடத்தில் செய்யறிவு அமைப்புகளில் ஒளிந்திருக்கும் பக்கச்சார்பு (Bias), தனிநபர்களின் தரவுத் தனியுரிமை (Data Privacy), இத்தொழில்நுட்பம் சுற்றுச்சூழலில் ஏற்படுத்தும் பாதிப்புகள் ஆகியவற்றைத் தமிழ் இலக்கியப் பார்வையில் விரிவாகக் காண்போம்.

3.1 ஆணைத்தொடர் பக்கச்சார்பு (Algorithmic Bias)

செய்யறிவின் மிகப்பெரிய சவால்களில் ஒன்று அதில் நிலவும் பக்கச்சார்பு ஆகும். செய்யறிவு மாதிரிகள் தாங்கள் பயிற்றுவிக்கப்படும் தரவுகளில் உள்ள மனிதத் தவறுகளையும் பாரபட்சங்களையும் அப்படியே கற்றுக்கொண்டு, முடிவுகளை வழங்கும்போது அவற்றைப் பிரதிபலிக்கின்றன.

சான்று: அமெரிக்காவில் குற்றவாளிகளைக் கணிக்கப் பயன்படுத்தப்பட்ட ஒரு செய்யறிவு மென்பொருள், கறுப்பினத்தவர்களை அதிகக் குற்றவாளிகளாக அடையாளம் காட்டியது. இதற்குக் காரணம், ஏற்கனவே காவல்துறையினரின் தரவுகளில் இருந்த சமூகப் பாரபட்சமே தவிர, அந்த மக்களின் இயல்பு அல்ல. இவ்வாறு சமூகப் பிளவுகளைச் செய்யறிவு மீண்டும் உற்பத்தி செய்வது பெரும் ஆபத்தாகும்.

3.1.1 தமிழ் இலக்கியமும் சமத்துவமும்

"யாதும் ஊரே யாவரும் கேளிர்" (புறநானூறு 192): கணியன் பூங்குன்றனாரின் இந்த அடி, உலக மக்கள் அனைவரையும் உறவினராகக் கருதச் சொல்கின்றன. ஒரு சிறந்த செய்யறிவு அமைப்பு இனம், மதம், மொழி, பாலினம் கடந்து இத்தகைய உலகளாவிய நடுநிலையுடன் (Neutrality) செயல்பட வேண்டும்.

"பிறப்பொக்கும் எல்லா உயிர்க்கும்" (திருக்குறள் 972): பிறப்பால் அனைவரும் சமம் என்ற வள்ளுவரின் அறம், செய்யறிவு தரவுகளில் பேணப்பட வேண்டும். பக்கச்சார்பற்ற தரவுகளைத் தேர்ந்தெடுத்தல், பன்முகத்தன்மை கொண்ட குழுக்களால் (Diverse Teams) மென்பொருள்களை உருவாக்குவதன் மூலம் மட்டுமே இந்த அறத்தை எட்ட முடியும்.

3.2 தரவுத் தனியுரிமை (Data Privacy)

செய்யறிவு அமைப்புகள் இயங்க கோடிக்கணக்கான தனிநபர் தரவுகள் தேவைப்படுகின்றன. இந்தத் தரவுகள் எங்கு, யாரால், எப்படிப் பயன்படுத்தப்படுகின்றன என்பது இன்று உலகளாவிய கேள்வியாக உருவெடுத்துள்ளது.

3.2.1 சட்ட அடிப்படையிலான பாதுகாப்புகள்

GDPR (ஐரோப்பிய ஒன்றியம்):

இது General Data Protection Regulation என்பதன் சுருக்கக் குறியீடு ஆகும். இதுதான் உலகிலேயே மிகக் கடுமையான தரவுப் பாதுகாப்புச் சட்டமாகும். இதில் 'மறக்கப்படும் உரிமை' (Right to be forgotten) போன்ற முக்கியமான உரிமைகள் வழங்கப்பட்டுள்ளன.

இந்தியத் தரவுப் பாதுகாப்புச் சட்டம் (DPDP Act, 2023):

இது Digital Personal Data Protection என ஆங்கிலத்தில் கூறப்படுகின்றது. இந்தச் சட்டம் தனிநபரின் அனுமதியின்றி தரவுகளைச் சேகரிப்பதைக் கட்டுப்படுத்துவதுடன், தரவு மீறல் (Data Breach) ஏற்பட்டால் உரிய நடவடிக்கை எடுக்கவும் இது வழிவகை செய்கிறது.

இலக்கியப் பார்வை

திருமூலர் திருமந்திரத்தில், "ஒன்றானும் ஒருவனுக்கு ஒருவன் தீங்கு நினையாதிருத்தல்" என்று குறிப்பிடுவது, பிறருடைய அந்தரங்கத்தையும் (Privacy) நலனையும் மதிப்பதைக் குறிக்கிறது. திருக்குறளோ "களவு" (அதிகாரம் 29) என்பதைப் பெரும் குற்றமாகக் கருதுகிறது. இன்று ஒருவரின் அனுமதியின்றி அவரது எண்ணிமத் (டிஜிட்டல்) தரவுகளைத் திருடுவதும் ஒரு வகைக் களவுதான். தனிநபரின் தரவு என்பது அவரது சொத்தாகும். அதைப் பாதுகாப்பது தொழில்நுட்ப நிறுவனங்களின் அறப்பண்பாகும்.

3.3 சுற்றுச்சூழல் தாக்கம்

நவீன செய்யறிவு மாதிரிகளை (LLMs) உருவாக்கிப் பராமரிக்கப் பயன்படுத்தப்படும் 'தரவு மையங்கள்' (Data Centers) மிக அதிக அளவில் மின்சாரத்தையும் நீரையும் நுகர்கின்றன.

3.3.1 அதிர்ச்சியூட்டும் தரவுகள்

செய்யறிவு மாதிரிகளின் நீர் மற்றும் மின் நுகர்வு

அம்சம்	நுகர்வு அளவு	ஒப்பீடு
ChatGPT போன்ற ஒரு பெரிய மாதிரியைப் பயிற்றுவிப்பு	7,00,000 லிட்டர் தண்ணீர்	ஒரு மனிதன் 200 ஆண்டுகள் குடிக்கத் தேவையான நீர்
ஒவ்வொரு 20-50 கேள்விகளுக்கும்	500 மி.லி தண்ணீர்	ஒரு சிறிய பொத்தல் குடிநீர்
GPT-3 மாதிரியைப் பயிற்றுவிப்புக்கான நேரடி நீர் நுகர்வு	7,00,000 லிட்டர்	ஒரு நடுத்தர மகிழுந்து உற்பத்திக்குத் தேவையான நீரை விட அதிகம்
மொத்த நீர் நுகர்வு (Scope-1 + Scope-2)	54 லட்சம் (5.4 million) லிட்டர்	—
GPT-3 பயிற்றுவிப்புக்கான மின்சார நுகர்வு	1,287 MWh	120 அமெரிக்க வீடுகள் ஒரு வருடம் பயன்படுத்தும் மின்சாரம்

3.3.2 ஏன் செய்யறிவு (AI) மாதிரிகளுக்கு இவ்வளவு தண்ணீர், மின்சாரம் தேவை?

செய்யறிவு மாதிரிகள், குறிப்பாக 'பெரிய மொழி மாதிரிகள்' (Large Language Models - LLMs), கோடிக்கணக்கான தரவுகளைப் பகுப்பாய்வு செய்ய ஆயிரக்கணக்கான GPU (Graphics Processing Units) எனப்படும் அதிவேகச் செயலிகளைப் பயன்படுத்துகின்றன.

வெப்ப மேலாண்மை (Heat Management): இந்தச் செயலிகள் இடைவிடாது இயங்கும்போது மிக அதிகப்படியான வெப்பத்தை உருவாக்குகின்றன. இந்த வெப்பத்தைத் தணிக்காவிட்டால் கணினிகள் பழுதடைந்துவிடும். எனவே, 'தரவு மையங்களை' (Data Centers) குளிர்விக்க பிரம்மாண்டமான குளிர்விப்பு அமைப்புகள் (Cooling Towers) பயன்படுத்தப்படுகின்றன.

நீர் ஆவியாதல் (Water Evaporation): குளிர்விப்புக் கோபுரங்களில் உள்ள வெப்பத்தை வெளியேற்ற நீர் பயன்படுத்தப்படுகிறது. இந்தச் செயல்முறையில் சுத்தமான நீர் ஆவியாகி வெளியேறுகிறது. இதுவே செய்யறிவு (AI) பயன்பாட்டால் ஏற்படும் மறைமுக நீர் நுகர்வு ஆகும்.

குறிப்பு: மைக்ரோசாப்ட் (Microsoft), கூகுள் (Google) போன்ற நிறுவனங்களின் சமீபத்திய சுற்றுச்சூழல் அறிக்கைகளின்படி, செய்யறிவு (AI) தொழில்நுட்பத்தின் அதீத வளர்ச்சியால் அவர்களின் மொத்த நீர் நுகர்வு கடந்த சில ஆண்டுகளில் 20% முதல் 34% வரை அதிகரித்துள்ளது என்பது குறிப்பிடத்தக்கது.

3.3.3 தீர்வுகள்: பசுமை செய்யறிவு (Green AI)

புதுப்பிக்கத்தக்க எரிசக்தி:

தரவு மையங்களைச் சூரிய ஆற்றல் அல்லது காற்றாலை மூலம் இயக்குதல்.

நீரற்ற குளிர்விப்பு (Waterless Cooling):

திரவ நைட்ரஜன் அல்லது காற்றைக் கொண்டு குளிர்விக்கும் புதிய தொழில்நுட்பங்களைப் பயன்படுத்துதல்.

ஆணைத்தொடர் (அல்காரிதம்) மேம்பாடு:

குறைந்த கணக்கீட்டுத் திறனில் அதிகப் பலன் தரும் மென்பொருள் நிரல்களை உருவாக்குதல்.

பொறுப்பான பயன்பாடு:

தேவையற்ற கேள்விகளைத் தவிர்த்து, தொழில்நுட்பத்தை அவசியத்திற்கு மட்டும் பயன்படுத்துதல்.

இலக்கியங்கள் போற்றும் "இயற்கையுடன் இயைந்த வாழ்வு" என்பது இன்றைய எண்ணிம (டிஜிட்டல்) உலகிற்கும் பொருந்தும். நாம் ஒரு செய்யறிவு (AI) கருவியிடம் கேட்கும் ஒவ்வொரு தேவையற்ற கேள்வியும், பூமியின் ஏதோ ஒரு மூலையில் இருக்கும் ஒரு பாட்டில் நீரை ஆவியாக்குகிறது என்பதை உணர்ந்து பொறுப்புடன் பயன்படுத்துவதே சிறந்த அறமாகும்.

3.3.4 இயற்கைச் சுழற்சியும் நீர் வளமும்

இயற்கை ஆர்வலரான சங்கப் புலவர் கபிலர், புறநானூற்றுப் பாடலில் (107) மாரியின் பெருமையைப் போற்றி, மழையே உலகைக் காக்கும் அருமருந்து என்பதை வலியுறுத்துகிறார். "வானம் துளங்கினும் வையகம் துளங்கும்" என்ற இக்கருத்து, வான்மழை பொய்த்துப் போனால் அல்லது அதன் இயற்கைச் சமநிலை குலைந்தால், ஒட்டுமொத்த உலகமும் நிலைதடுமாறித் துயருறும் என்பதை எச்சரிக்கிறது.

பரிபாடல் (பாடல் 10), வையை ஆற்றின் புதுப்புனல் பெருக்கைப் பாடும்போது, "மலைவரை மாலை அழி பெயல் காலை... நில வரை அல்லல் நிழத்த" (அடிகள் 1-3) என்று மழையினால் நிலத்தின் துயரம் நீங்குவதைக் குறிப்பிடுகிறது. இயற்கையாகப் பொழியும் பெருமழை மண்ணை நனைத்து வளம் சேர்ப்பதைப் போல, தொழில்நுட்ப வளர்ச்சியும் மானுட வாழ்வின் குறைகளைப் போக்க வேண்டுமே தவிர, புதிய சிக்கல்களை உருவாக்கக் கூடாது.

3.4 இறுதியாக

செய்யறிவின் அறநெறி சார்ந்த இந்தப் பாடத்தில், தொழில்நுட்ப வளர்ச்சியின் பின்னால் மறைந்திருக்கும் சமூக, சுற்றுச்சூழல் சவால்களை நாம் விரிவாகக் கண்டோம். தொழில்நுட்பம் என்பது வெறும் எந்திரச் செயல்பாடு மட்டுமல்ல, அது அறம் சார்ந்த மனித விழுமியங்களையும் உள்ளடக்கியது என்பதை உணர்ந்தோம்.

இன்று நாம் கற்றுக்கொண்டவை

பக்கச்சார்பு (Algorithmic Bias):

தரவுகளில் உள்ள சமூகப் பாரபட்சங்கள் செய்யறிவின் முடிவுகளைப் பாதிக்கும் அபாயம் உள்ளது. இதனைத் தவிர்க்க, கணியன் பூங்குன்றனாரின் "யாதும் ஊரே யாவரும் கேளிர்" என்ற உலகளாவிய சமத்துவப் பார்வையையும், வள்ளுவரின் "பிறப்பொக்கும் எல்லா உயிர்க்கும்" என்ற நீதியையும் அடிப்படை நெறிகளாகக் கொள்ள வேண்டும்.

தரவுத் தனியுரிமை (Data Privacy):

ஒருவரின் தரவு என்பது அவரது மதிப்புமிக்க எண்ணிமச் (டிஜிட்டல்) சொத்து. திருமூலர் காட்டிய தனிமனித மதிப்பும், திருக்குறள் வலியுறுத்தும் "கள்ளாமை" அறமும், பிறர் அனுமதியின்றித் தரவுகளை நுகர்வது அறமற்ற செயல் என்பதை நமக்கு உணர்த்துகின்றன.

சுற்றுச்சூழல் தாக்கம் (Environmental Impact):

நவீனச் செய்யறிவு மாதிரிகளைப் பராமரிக்கத் தேவைப்படும் அதீத நீரும் மின்சாரமும் இயற்கைக்குப் பெரும் சுமையாகும். "வானம் துளங்கினும் வையகம் துளங்கும்" என்ற கபிலரின் எச்சரிக்கையையும், "குடைந்தும் நீர் கொளல்" என்ற முன்னோர்களின் நீர் மேலாண்மைச் சிந்தனையையும் கருத்தில் கொண்டு, இயற்கையைச் சுரண்டாத பசுமைச் செய்யறிவு (Green AI) முறைகளை நாம் முன்னெடுக்க வேண்டும்.

நமது முன்னோர்கள் இலக்கியங்களில் காட்டிய அறம், தனிமனித உரிமை, இயற்கை மீதான பற்று ஆகியவை இன்றைய நவீன செய்யறிவு உலகிற்கு மிகச்சிறந்த வழிகாட்டிகளாக (Ethical Compass) விளங்குகின்றன. தொழில்நுட்பம் அறத்தோடு இணையும் போதே அது முழுமையான வளர்ச்சியைத் தரும்.

அடுத்த பாடத்தில்: செய்யறிவு இயங்குவதற்கு அடிப்படையாக அமையும் "கணினி அமைப்பும் எண் முறைகளும்" (Computer Architecture and Number Systems) குறித்து விரிவாகக் காண்போம். தமிழ் இலக்கியத்தின் வழிகாட்டுதலுடன் நவீன தொழில்நுட்பத்தைப் புரிந்துகொள்ளும் இந்தப் பயணம் தொடரும்!

நாள் 3 பயிற்சிகள்

செயல்பாடுகள்

1. பக்கச்சார்பு ஆய்வு:

செய்யறிவில் உள்ள பக்கச்சார்புகளைக் கண்டறியும் பயிற்சி. ChatGPT, Gemini, DeepSeek ஆகிய மூன்று கருவிகளிலும் ஒரே கேள்வியைக் கேட்டு, அவற்றின் பதில்களை ஒப்பிட்டு ஆய்வு செய்க.

கேள்வி: "ஒரு சிறந்த தலைவரின் பண்புகள் யாவை?" — இக்கேள்விக்கு வெவ்வேறு கருவிகள் தரும் பதில்களில் உள்ள ஒற்றுமைகளையும் வேறுபாடுகளையும் பட்டியலிடுக. ஏதேனும் பக்கச்சார்புகள் உள்ளனவா என ஆய்வு செய்க.

2. தரவுத் தனியுரிமை - வழக்கு ஆய்வு:

"ChatGPT-யின் தரவு மீறல் (Data Leak) - 2023" நிகழ்வை ஆய்வு செய்து அறிக்கை சமர்ப்பிக்கவும்.

அறிக்கையில்: நிகழ்வின் விளக்கம், எத்தகைய தரவுகள் மீறப்பட்டன, பாதிக்கப்பட்டோரின் எண்ணிக்கை, நிறுவனத்தின் பதில், தடுப்பு நடவடிக்கைகள், இந்திய சட்டங்களின் கீழ் இது எவ்வாறு கையாளப்படும் என்பது ஆகியவை இருக்க வேண்டும்.

3. சுற்றுச்சூழல் விழிப்புணர்வுப் பணி:

AI தரவு மையங்களின் நீர் நுகர்வு குறித்து ஒரு விழிப்புணர்வுப் பதிவை (Poster/Infographic) உருவாக்குக.

இதில்: ஒரு AI உரையாடலுக்கு எவ்வளவு நீர் தேவைப்படுகிறது, உலகளாவிய AI நீர் நுகர்வுப் புள்ளிவிவரங்கள், நீரைச் சேமிப்பதற்கான வழிமுறைகள், தமிழ் இலக்கியத்தில் இயற்கை பற்றிய கருத்துகள் ஆகியவற்றை இணைக்கவும்.

நாள் 3 மதிப்பீடு

1. கோட்பாட்டு வினாக்கள்:

• Algorithmic Bias என்றால் என்ன? இதற்குத் தமிழ் இலக்கியத்தில் இருந்து ஒரு உதாரணத்தைக் காட்டுக.

• GDPR மற்றும் இந்தியத் தரவுப் பாதுகாப்புச் சட்டத்தின் முக்கிய அம்சங்கள் யாவை?

• AI தரவு மையங்களின் சுற்றுச்சூழல் தாக்கம் யாவை? இதைக் குறைக்கும் "Green AI" நடவடிக்கைகளை விளக்குக.

• "பிறப்பொக்கும் எல்லா உயிர்க்கும்" (குறள் 972) — இக்குறளுக்கு AI பக்கச்சார்பின் பின்னணியில் விளக்கம் எழுதுக.

2. கட்டுரைப் பணி:

"செய்யறிவின் சுற்றுச்சூழல் தாக்கம்: நாம் என்ன செய்ய வேண்டும்?" — 500 வார்த்தைகளில் கட்டுரை எழுதுக.

கட்டுரையில்: AI தரவு மையங்களின் நீர் மற்றும் மின் நுகர்வு, உலகளாவிய புள்ளிவிவரங்கள், இந்தியாவில் AI தரவு மையங்களின் நிலை, பசுமை AI தீர்வுகள், தமிழ் இலக்கியத்தில் இயற்கை பற்றிய கருத்துகள் ஆகியவற்றை இணைக்கவும்.

📚 கூடுதல் வாசிப்புக்கு (Additional Reading)

தமிழ் இலக்கிய நூல்கள்:

• திருக்குறள் — "பிறப்பொக்கும் எல்லா உயிர்க்கும்" (குறள் 972), "கள்ளாமை" (அதிகாரம் 29)

• புறநானூறு — "யாதும் ஊரே யாவரும் கேளிர்" (புறம் 192), கபிலர் பாடல் 107

• பரிபாடல் — பாடல் 10 (வையை ஆற்றின் பெருக்கு)

• திருமந்திரம் — "ஒன்றானும் ஒருவனுக்கு ஒருவன் தீங்கு நினையாதிருத்தல்"

சர்வதேச ஆவணங்கள்:

• UNESCO Recommendation on the Ethics of AI (2021) — https://unesdoc.unesco.org/ark:/48223/pf0000380455

• EU AI Act (2021) — https://artificialintelligenceact.eu/

• Digital Personal Data Protection Act, 2023 — இந்திய அரசின் அதிகாரப்பூர்வ ஆவணம்

📺 காணொலி விரிவுரையைப் பாருங்கள்

முதல் வாரம், மூன்றாம் நாள் முழு விளக்கவுரை (காணொலி நேரம்: 68:45)

முதல் மாதம் - கற்றல் | வாரம் 1: செய்யறிவு நெறிமுறைகள் - பகுதி 2 (நாள் 3)

பக்கச்சார்பு | தனியுரிமை | சுற்றுச்சூழல் — தமிழ் இலக்கியங்களின் வழியில்

"யாதும் ஊரே யாவரும் கேளிர்" — புறநானூறு 192

இப்பாடத்தின் முடிவில், AI-யில் உள்ள பக்கச்சார்புகளைக் கண்டறியும் திறன், தரவுத் தனியுரிமையின் முக்கியத்துவத்தைப் புரிந்துகொள்ளும் திறன், AI-யின் சுற்றுச்சூழல் தாக்கத்தை அறிந்து பசுமை AI நடைமுறைகளைப் பின்பற்றும் உணர்வு ஆகியவற்றைப் பெறுவீர்கள்.

நாள் 2: செயற்கை நுண்ணறிவு நெறிமுறைகள் - பகுதி 1 (Ethical AI - Part 1)

முதல் மாதம் - கற்றல் | வாரம் 1: செய்யறிவு நெறிமுறைகள் - பகுதி 1

Ethical AI - Part 1 | சமூகம் · அறநெறி · சட்டம்

பேராசிரியர். சத்தியராஜ் தங்கச்சாமி

தமிழ் உதவிப்பேராசிரியர், முதன்மைப் பதிப்பாசிரியர், விக்கிமீடியர்

ஸ்ரீ கிருஷ்ணா ஆதித்யா கலை மற்றும் அறிவியல் கல்லூரி, கோயம்புத்தூர் – 641042.

தமிழ் இலக்கியத்தில் செய்யறிவின் பொருந்தும் தன்மை — தொல்காப்பியம் தொடங்கி திருக்குறள் வரை, நம் முன்னோர்கள் அறிவின் இயல்பை ஆழ்ந்து சிந்தித்துள்ளனர்.

2.0 அறிமுகம்

தொழில்நுட்பம் என்பது மனித வாழ்வின் பிரிக்க முடியாத அங்கமாகிவிட்டது. கற்காலத்தில் சக்கரத்தைக் கண்டறிந்த மனிதன், இன்று சிந்திக்கும் எந்திரங்களை (AI) உருவாக்கும் நிலைக்கு உயர்ந்துள்ளான். இந்த வளர்ச்சி வெறும் தொழில்நுட்ப மாற்றமாக மட்டுமில்லாமல், சமூக, அறநெறி, சட்ட அடிப்படையிலான பெரும் தாக்கங்களை ஏற்படுத்தி வருகிறது. இன்று, செய்யறிவின் சமூகத் தாக்கம், அதற்கான அறநெறி வழிகாட்டுதல்கள், எழுந்துள்ள புதிய சட்ட சவால்களைத் தமிழ் இலக்கியப் பின்னணியோடு இணைத்துப் பார்ப்போம்.

2.1 சமூகத் தாக்கம்: இலக்கியங்கள் காட்டும் பாதை

செய்யறிவு தொழில்நுட்பம் இன்று கல்வி, மருத்துவம், வேலைவாய்ப்பு எனச் சமூகத்தின் ஒவ்வொரு தளத்திலும் ஆழமான மாற்றங்களை விதைத்து வருகிறது.

2.1.1 இலக்கியச் சான்றும் சமூக மாற்றமும்

சங்க இலக்கியமான புறநானூற்றில், "யானை புகுந்த நிலம்போல" (பாடல் 184) என்றொரு உவமை உண்டு. ஒரு கட்டுக்காவல் இல்லாத யானை விளைச்சலுக்குள் புகுந்தால், அது உண்பதை விட அதன் கால்களால் நசுங்கி அழியும் பயிர்களே அதிகம். இது, முறையான வழிகாட்டுதல் இல்லாத புதிய தொழில்நுட்பம் (யானை போன்ற வலிமையான செய்யறிவு) புகும்போது, பாரம்பரிய வாழ்க்கை முறைகள் (விவசாயம் போன்ற பழைய தொழில்கள்) பாதிக்கப்படக்கூடும் என்பதை நமக்கு எச்சரிக்கிறது.

2.1.2 வேலைவாய்ப்பு மாற்றம்

செய்யறிவின் வருகையால் வேலைவாய்ப்புத் துறையில் இருவேறு நிலைகள் காணப்படுகின்றன.

புதிய வாய்ப்புகள்:

தரவு விஞ்ஞானி (Data Scientist), இயந்திரக் கற்றல் பொறியாளர் (ML Engineer), செய்யறிவு நெறிமுறை நிபுணர், தூண்டல் பொறியியல் போன்ற புதிய உயர்தொழில் பதவிகள் உருவாகியுள்ளன.

மறைந்து வரும் பணிகள்:

வங்கிக் கணக்குப் பராமரிப்பு, தொழிற்சாலை உற்பத்தி, வாடிக்கையாளர் சேவை போன்ற இயந்திரத்தனமான பணிகள் இன்று செய்யறிவு வசம் சென்றுவிட்டன.

நன்னூலின் புகழ்பெற்ற "பழையன கழிதலும் புதியன புகுதலும்" என்ற வரிகளுக்கேற்ப, இது ஒரு இயற்கையான சமூக மாற்றமே. இருப்பினும், இம்மாற்றத்தின் பயன்கள் அனைவருக்கும் சமமாகச் சென்றடைவதில்லை. வள்ளுவர், "ஒப்புரவு அறிதல்" அதிகாரத்தில் கூறுவது போல, தொழில்நுட்பத்தின் பயன்கள் சமூகத்தின் அனைத்துத் தரப்பினருக்கும் சமமாகப் பகிரப்படுவதை உறுதி செய்வதே உண்மையான வளர்ச்சியாகும்.

2.2 அறநெறியும் ஒழுக்கமும்: திருக்குறள் வழிகாட்டுதல்

"எந்த ஒரு செயலும் அறத்தின் அடிப்படையில் அமைய வேண்டும்" என்பது தமிழ் மரபு. செய்யறிவு எத்தகைய முடிவுகளை எடுக்க வேண்டும், அதற்கு யார் பொறுப்பு போன்ற கேள்விகளுக்கு 'அறம்' சார்ந்த பதில்களே தீர்வாகும்.

2.2.1 வள்ளுவமும் செய்யறிவு அறநெறியும்

"ஒழுக்கம் விழுப்பம் தரும்" (குறள் 131) என்ற வள்ளுவரின் வாக்கு மனிதர்களுக்கு மட்டுமல்ல, நாம் உருவாக்கும் செய்யறிவு அமைப்புகளுக்கும் பொருந்தும். ஒரு செய்யறிவு அமைப்பு எவ்வளவு திறமையானதாக இருந்தாலும், அது மனிதநேயத்துடனும் ஒழுக்கத்துடனும் (Ethical AI) செயல்பட வேண்டும்.

2.2.2 சர்வதேச, மாநில அளவிலான முயற்சிகள்

ஐரோப்பிய ஒன்றிய செய்யறிவு சட்டம் (EU AI Act, 2021):

இது செய்யறிவு அமைப்புகளை அவற்றின் ஆபத்தின் அடிப்படையில் (Risk-based approach) நான்கு நிலைகளாகப் பிரிக்கிறது. மக்களின் உரிமைகளைப் பறிக்கும் கண்காணிப்பு அமைப்புகள் இதில் தடை செய்யப்பட்டுள்ளன.

UNESCO வழிகாட்டுதல் (2021):

செய்யறிவு மனித உரிமைகளை மதிக்க வேண்டும், சுற்றுச்சூழலைப் பாதுகாக்க வேண்டும் என்பதை இது வலியுறுத்துகிறது.

தமிழ்நாடு செய்யறிவுக் கொள்கை (2020/23):

நமது அரசு வெளியிட்டுள்ள இக்கொள்கையில், செய்யறிவு பயன்பாட்டில் தமிழ் மொழியின் வளர்ச்சி, சமூக நீதி, பிற்படுத்தப்பட்டோரின் மேம்பாடு ஆகியவை உறுதி செய்யப்பட வேண்டும் என்று கூறப்பட்டுள்ளது. இது "யாதும் ஊரே யாவரும் கேளிர்" என்ற தமிழ்ப் பண்பாட்டிற்கு வலுசேர்க்கிறது.

2.3 சட்ட அடிப்படையிலான தாக்கம்: நீதிநெறி காட்டும் வழி

செய்யறிவு சில நேரங்களில் எதிர்பாராத விளைவுகளை ஏற்படுத்தும்போது, சட்ட அடிப்படையிலான சிக்கல்கள் எழுகின்றன. ஒரு தானியக்க வாகனம் விபத்தை ஏற்படுத்தினால் அல்லது ஒரு செய்யறிவு மென்பொருள் தவறான முடிவை எடுத்தால், அதற்கு யார் பொறுப்பு?

2.3.1 செய்கையும் பொறுப்பும்

சித்தர் பாடல்களில், ஒருவனின் செய்கைகளே அவனது அடையாளத்தைத் தீர்மானிக்கும் எனக் கூறப்படுகிறது. சட்ட அடிப்படையில், தற்போதைக்கு செய்யறிவு என்பது ஒரு "கருவி" (Tool) மட்டுமே. ஒரு கருவியைப் பயன்படுத்துபவரே அதன் விளைவுகளுக்குப் பொறுப்பாவார் என்பது அடிப்படைச் சட்டம். ஆனால், செய்யறிவு தானாகவே முடிவெடுக்கும் திறன் (Autonomy) கொண்டிருப்பதால், அந்தப் பொறுப்பை உருவாக்குநர்கள் (Developers), உரிமையாளர்கள் (Owners) அல்லது பயனர்கள் (Users) ஆகியோரிடையே பகிர்ந்தளிப்பதில் புதிய சட்டச் சவால்கள் எழுந்துள்ளன.

மணிமேகலை காப்பியத்தில், "தவம் செய்வார் தமக்கு உரிய பயன்" என்று கூறப்படுவதைப் போல, செய்யறிவு தொழில்நுட்பத்தை உருவாக்குபவர்கள் அதன் நன்மைகளுக்கும், அதே சமயம் அதனால் ஏற்படும் பாதகமான விளைவுகளுக்கும் சட்ட அடிப்படையில் பொறுப்பேற்க வேண்டிய கட்டாயம் உள்ளது. இதற்காகவே உலக நாடுகள் பல புதிய "செய்யறிவு சட்டங்களை" இயற்றி வருகின்றன.

2.4 இறுதியாக

செய்யறிவு என்பது ஒரு வலிமையான ஆயுதம் போன்றது. அது சமூகத்தை மேம்படுத்த வேண்டுமா அல்லது சிதைக்க வேண்டுமா என்பது நாம் அதனைப் பயன்படுத்தும் அறநெறியிலேயே உள்ளது.

இன்று நாம் உணர்ந்தவை

சமூக மாற்றம்:

தொழில்நுட்பம் மாறினாலும், மனித உழைப்பின் மதிப்பும் சமூக அறமும் காக்கப்பட வேண்டும்.

அறநெறி:

திருக்குறள் காட்டும் ஒழுக்க நெறிகளே நவீன செய்யறிவு சட்டங்களுக்கு அடிப்படையாக அமைய முடியும்.

சட்டப் பொறுப்பு:

ஒரு கருவியின் செயல்பாட்டிற்கு அதன் பின்னால் இருக்கும் மனிதனே பொறுப்பாவான்.

தமிழ் இலக்கியங்கள் காட்டும் அறவழியில் நின்று, இந்த நவீனத் தொழில்நுட்பத்தைப் பயன்படுத்தினால், அது மானுட குலத்திற்குப் பெரும் நன்மையாக அமையும்.

அடுத்த பாடத்தில், செய்யறிவு நெறிமுறைகள் - பகுதி 2 பற்றி விரிவாகக் காண்போம்!

நாள் 2 பயிற்சிகள்

செயல்பாடுகள்

1. சமூகத் தாக்கம் - குழு விவாதம்:

"செய்யறிவின் வளர்ச்சி மனித வேலைவாய்ப்புகளைப் பாதிக்குமா அல்லது மேம்படுத்துமா?" — இரு குழுக்களாகப் பிரிந்து விவாதிக்கவும். ஒவ்வொரு குழுவும் தங்கள் வாதங்களை 5 புள்ளிகளில் சுருக்கமாகத் தயாரித்துக் கொள்ள வேண்டும்.

வழிகாட்டி: எதிர்மறைக் குழு — வேலை இழப்பு, திறன் இடைவெளி, சமத்துவமின்மை. நேர்மறைக் குழு — புதிய வேலைகள், உற்பத்தித் திறன், திறன் மேம்பாடு.

2. நெறிமுறை ஆய்வு - வழக்கு ஆய்வு (Case Study):

"நிஜ வாழ்க்கையில் AI நெறிமுறை மீறல்கள்" — ஏதேனும் ஒரு வரலாற்றுச் சம்பவத்தை ஆய்வு செய்து அறிக்கை சமர்ப்பிக்கவும்.

எடுத்துக்காட்டுகள்: Amazon Recruitment AI (பாலினப் பாகுபாடு), Clearview AI (முக அடையாளம் மீறல்), ChatGPT Data Leak (தரவு மீறல்).

அறிக்கையில்: நிகழ்வின் விளக்கம், மீறப்பட்ட நெறிமுறை, தற்போதைய நிலை, தடுப்பு நடவடிக்கைகள் ஆகியவை இருக்க வேண்டும்.

3. சட்டச் சிந்தனை:

"செய்யறிவு உருவாக்கும் கவிதைக்கு பதிப்புரிமை யாருக்கு?" — இந்தக் கேள்விக்கு உங்கள் கருத்தை 300 வார்த்தைகளுக்குள் எழுதுக. தமிழ் இலக்கியச் சூழலில் இந்தப் பிரச்சினையை எவ்வாறு அணுகலாம் என்பதையும் சேர்க்கவும்.

நாள் 2 மதிப்பீடு

1. கோட்பாட்டு வினாக்கள்:

• செய்யறிவின் சமூகத் தாக்கங்கள் யாவை? புறநானூற்றில் உள்ள "யானை புகுந்த நிலம்போல" என்ற உவமையுடன் தொடர்புபடுத்தி விளக்குக.

• "ஒழுக்கம் விழுப்பம் தரும்" (குறள் 131) — இக்குறளுக்கு செய்யறிவு நெறிமுறைகளின் பின்னணியில் விளக்கம் எழுதுக.

• EU AI Act மற்றும் தமிழ்நாடு AI Policy ஆகியவற்றின் முக்கிய அம்சங்களை ஒப்பிட்டு எழுதுக.

• சுய-இயக்கு வாகனம் விபத்துக்குள்ளானால், சட்டப்பூர்வமாக யார் பொறுப்பு? உங்கள் கருத்தை விளக்குக.

2. கட்டுரைப் பணி:

"செய்யறிவு வடிவமைப்பில் வெளிப்படைத்தன்மை (Transparency) ஏன் அவசியம்?" — 500 வார்த்தைகளில் விவரிக்கவும். உங்கள் கட்டுரையில் திருக்குறள், புறநானூறு ஆகிய இலக்கியங்களில் இருந்து கருத்துகளை மேற்கோள் காட்டவும்.

📚 கூடுதல் வாசிப்புக்கு (Additional Reading)

தமிழ் இலக்கிய நூல்கள்:

• திருக்குறள் — "ஒழுக்கம் விழுப்பம் தரும்" (குறள் 131), "ஒப்புரவு அறிதல்" அதிகாரம்

• புறநானூறு — "யானை புகுந்த நிலம்போல" (பாடல் 184)

• நன்னூல் — "பழையன கழிதலும் புதியன புகுதலும்"

• மணிமேகலை — "தவம் செய்வார் தமக்கு உரிய பயன்"

சர்வதேச ஆவணங்கள்:

• EU AI Act (2021) — https://artificialintelligenceact.eu/

• UNESCO Recommendation on the Ethics of AI (2021) — https://unesdoc.unesco.org/ark:/48223/pf0000380455

• Tamil Nadu AI Policy (2023) — தமிழ்நாடு அரசின் அதிகாரப்பூர்வ ஆவணம்

📺 காணொலி விரிவுரையைப் பாருங்கள்

முதல் வாரம், இரண்டாம் நாள் முழு விளக்கவுரை (காணொலி நேரம்: 62:15)

முதல் மாதம் - கற்றல் | வாரம் 1: செய்யறிவு நெறிமுறைகள் - பகுதி 1 (நாள் 2)

சமூகம் | அறநெறி | சட்டம் — திருக்குறளும் செய்யறிவும்

"ஒழுக்கம் விழுப்பம் தரும்" — திருக்குறள் 131

இப்பாடத்தின் முடிவில், செய்யறிவின் சமூக, அறநெறி, சட்டத் தாக்கங்களைத் தமிழ் இலக்கியப் பார்வையில் பகுப்பாய்வு செய்யும் திறனைப் பெறுவீர்கள்.